2025 Winterfair 27 t/m 29 december

Op 27, 28 en 29 december was het weer een gezellige boel in de studio van RTV Drenthe. Op de radio kunnen je luustern naor de Drentse 1000 en in het Atrium was er weer de gezellige Winterfair. Het zag er prachtig oet.  Der waren mooie kraompies, waoras je leuke en nuttige spullegies kopen kunden. Undertussen kunnen je ok even deur het raom in de uutzendruumte kieken en zölfs een rondleiding kriegen deur de studio. Der waren wat minder bezukers dan veurig jaar, maor dat har ok met het weer te maken, het was kold en glad en mistig. Echt Winterfair-weer dus. Wij van de Vrienden van RTV Drenthe waren er natuurlijk ok. Veur de daarde keer al weer. Samen met RTV Drenthe hadden wij twee kraompies. Daorin verkochten wij oeze eigen spullegies, tassies, sleutelhangers, boekenleggers en naotuurlijk knieperties. Henny Bouwman har weer een mooi muziekpuzzel maakt, waor je met een goeie oplössing een CD kunnen winnen van Harm en Roelof, Daniël Lohues of Tik Tok Tammo. En naotuurlijk kunnen de bezukers zich ok weer anmelden as lid van oeze Vereniging. Veur RTV Drenthe verkochten wij koffie, thee, sukkelaodemelk, glühwein en frisdrank en ok  spullegies van de Ömroep, zaos mooie sokken, koektrommegies, kersttruien, knuffelberen en veural veul van de mooie RTV Drenthe mutsen. De gehaktballen gungen ok rap over de teunbank. Wij hebt 200 zakkies knieperties verkocht. Dat is een bult um te bakken. Dat heb wij as bestuur daon, met nog hulp van een paar leden. Bakkers, nog bedankt veur alle (bak)hulp. Undertussen heb wij wal wat van oeze spullegies verkocht, maor dat leup niet zo geweldig.

Maor nou heb wij dus veur de leden die dat mist hebt nog wal wat tassies, boekenleggers en sleutelhangers te koop. De winterfair hef wal 52 nije leden opleverd. Ok mooi.

De samenwerking met de mensen van RTV Drenthe was hiel goed en plezierig.

De mensen die de Cd’s wunnen hebt waren:
Zaoterdag 27 december, Hennie Heeling oet Slien
Zundag 28 december, Hillie Brink oet Roden
Maandag 29 december, Dennis Snijder oet Assen

De priezen bint bij de winnaars thuus bezörgd. Fielsteerd en geniet van de mooie muziek. 

Henny van der Veen